Ajit Pawar Plane Crash : “मेडे, मेडे, मेडे” हे शब्द हवाई वाहतूक नियंत्रण अधिकाऱ्याने सलग तीन वेळा ऐकले तर याचा अर्थ असा होतो की पायलट विमान नियंत्रित करू शकत नाही, तो क्रॅश होणार आहे. तथापि, बारामती येथे क्रॅश झालेल्या विमानात पायलटने मेडे कॉल केला नाही. याचे कारण काय होते? अपघातापूर्वी पायलटला एकदा अपयशी ठरल्यानंतर, तो दुसऱ्या प्रयत्नात विमान उतरवू शकेल, असा विश्वास होता का? की मेडे कॉल न करण्याचे काही दुसरे कारण आहे? सध्या हे समजून घेणे महत्त्वाचे आहे.
उपमुख्यमंत्री अजित पवार यांना मुंबईहून बारामतीला घेऊन जाणारे विमान हे एक खाजगी ‘लिअरजेट ४५’ होते. व्हीएसआर व्हेंचर्स प्रायव्हेट लिमिटेडच्या मालकीच्या या चार्टर्ड विमानात दोन पायलट होते. मुख्य पायलट सुमित कपूर आणि सह-पायलट कॅप्टन संभावी पाठक. या दोघांव्यतिरिक्त, उपमुख्यमंत्री अजित पवार यांचे वैयक्तिक सुरक्षा अधिकारी एचसी विदिप जाधव आणि फ्लाइट अटेंडंट पिंकी माळी विमानात होते.
वैमानिकांचे शेवटचे शब्द काय ?
अपघातापूर्वी परिस्थिती कितीही गंभीर असली तरी, वैमानिक नेहमीच एटीसीला त्यांचे विमान अपघातग्रस्त होणार असल्याची माहिती देण्यासाठी मेडे कॉल करतो. मात्र अजित पवारांच्या विमानाचे वैमानिक सुमित कपूर यांनी मेडे कॉल केला नाही. सह-वैमानिक कॅप्टन संभावी पाठक यांनीही मेडे कॉल केला नाही, त्यांचे शेवटचे शब्द “अरे शिट… अरे शिट” होते.
दुसऱ्यांदा लँडिंग करण्याचा प्रयत्न
पायलट सुमित कपूरने प्रथम बारामती विमानतळाच्या धावपट्टी क्रमांक ११ वर विमान उतरण्याचा प्रयत्न केला. परंतु धुक्यामुळे दृश्यमानता कमी होती, ८०० मीटरपर्यंत घसरली होती, त्यामुळे त्यांना धावपट्टी दिसत नव्हती.
वैमानिकाने विमान उचलले अन्…
त्यामुळे वैमानिकाने विमान उचलले आणि पुन्हा उतरवण्याचा प्रयत्न केला. पण दुसऱ्यांदा विमान धावपट्टीवर पोहोचू शकले नाही, उतरण्यापूर्वीच जमिनीवर आदळले. लगेचच त्याला आग लागल्याने चार-पाच स्फोट होऊन संपूर्ण विमान उध्वस्त झाले.
आतापर्यंत समोर असलेल्या प्राथमिक माहिती आणि सीसीटीव्ही फुटेजनुसार, पायलटच्या दुसऱ्यांदा उतरवण्याच्या प्रयत्नादरम्यान, त्याच्याकडे विमान नियंत्रित करण्यासाठी वेळ नसल्याने तो मेडे कॉल करू शकला नाही. पायलटला मेडे कॉल करण्याची गरज लक्षात येईपर्यंत, विमान आधीच आदळले होते. सह-वैमानिक संभावी पाठकने विमान कोसळण्याच्या काही सेकंद आधी “अरे शिट, ओह शिट” असे म्हटले होते, अशी प्राथमिक माहिती आहे. या प्रकरणाची नागरी विमान वाहतूक महासंचालनालय (DGCA) अधिक चौकशी करीत आहे.
