Holi Special Train : होळी सणाच्या पार्श्वभूमीवर प्रवाशांची वाढती गर्दी लक्षात घेऊन मध्य रेल्वेने 209 होळी विशेष गाड्या चालवण्याचा निर्णय घेतला आहे. सणाच्या काळात आपल्या गावी जाणाऱ्या प्रवाशांना दिलासा मिळावा आणि नियमित गाड्यांवरील ताण कमी व्हावा, यासाठी ही विशेष सोय करण्यात आली आहे.
दरवर्षी होळीच्या सुमारास प्रमुख शहरांमधून मोठ्या प्रमाणात प्रवासी आपल्या मूळ गावी जातात. त्यामुळे नियमित गाड्यांमध्ये प्रचंड गर्दी होते. या पार्श्वभूमीवर अतिरिक्त विशेष गाड्यांचे नियोजन करण्यात आले आहे. या गाड्यांमध्ये वातानुकूलित (एसी) विशेष गाड्या, एसीसह शयनयान कोच तसेच सामान्य द्वितीय श्रेणीचे कोच असलेल्या अनारक्षित विशेष गाड्यांचा समावेश आहे. त्यामुळे विविध आर्थिक स्तरातील प्रवाशांना या सुविधेचा लाभ घेता येणार आहे.
ही विशेष गाड्या प्रामुख्याने मुंबई-नागपूर-मुंबई, मुंबई-रत्नागिरी-मुंबई आणि मुंबई-चिपळूण-मुंबई या प्रमुख मार्गांवर धावणार आहेत. त्यामुळे कोकण आणि विदर्भ भागात जाणाऱ्या प्रवाशांना मोठा फायदा होणार आहे. सणासुदीच्या काळात जागेअभावी होणारी गैरसोय टळण्यास मदत होईल, अशी अपेक्षा आहे.
प्रवाशांच्या सोयीसाठी स्थानकांवर अतिरिक्त तिकीट खिडक्या उपलब्ध करून देण्यात येणार आहेत. तसेच गर्दीचे योग्य नियोजन करण्यासाठी रेल्वे प्रशासनाने विशेष उपाययोजना आखल्या आहेत. या विशेष गाड्यांचे वेळापत्रक आणि थांब्यांची सविस्तर माहिती लवकरच जाहीर करण्यात येणार असल्याचे मध्य रेल्वेकडून सांगण्यात आले आहे.
(आपल्या परिसरातील सामाजिक, राजकीय, शैक्षणिक, क्रीडा, धार्मिकसह विविध क्षेत्रातील बातमी प्रसिद्धीसाठी “डिजिटल शौर्य मराठी”च्या 7030385085 या क्रमांकवर पाठवावी.)
