नंदुरबार : हनीट्रॅपच्या माध्यमातून दोघांकडून चार लाखांची मागणी केल्याची घटना नंदुरबारात घडली. याप्रकरणी संबंधित दोन्ही महिला व इतर तिघांविरुद्ध नंदुरबार शहर पोलिसांत गुन्हा दाखल करण्यात आला आहे.
तक्रारीनुसार, गांधीनगरनजीक असलेल्या एका ट्रेडर्समध्ये अनिल शांतिलाल पाटील, रा. डोंगरगाव, ता. शहादा यांना व त्यांच्या मित्रास महिलेने बोलावून घेतले. तेथीलच एका घरात त्याला घेऊन जाऊन एका महिलेसोबत उभे केले व कपडे काढण्यास सांगितले.
त्याचवेळी सोनू अनिल करमरकर, दशरथ शिंदे हे तिथे आले व त्यांनी व्हिडीओ तयार करून घेतला. त्यानंतर काही वेळात गोपाल माळी हा तेथे आला व त्याने पोलिस असल्याची बतावणी केली.
अनिल पाटील व त्याचा मित्र संदीप नागो पाटील यांना या प्रकरणात तुमची मोठी बदनामी होईल. त्यामुळे समझोता करून देत असल्याचे सांगून चार लाख रुपयांची मागणी केली. यामुळे धास्तावलेल्या दोघांनी त्यांच्यापासून सुटका करून घेत दुसऱ्या दिवशी नंदुरबार शहर पोलिस ठाणे गाठून याबाबत फिर्याद दिली.
अनिल पाटील याच्या फिर्यादीवरून दोन्ही महिला आणि सोनू करमरकर, दशरथ शिंदे व गोपाल माळी सर्व रा. नंदुरबार यांच्याविरुद्ध तोतयेगिरी करून पैशांची मागणी केल्याप्रकरणी गुन्हा दाखल करण्यात आला आहे. तपास फौजदार किरण पाटील करीत आहेत. पोलिसांकडून संशयितांचा शोध घेतला जात आहे.
