Bangladesh Cricket Board : बांगलादेश क्रिकेट बोर्डाने (बीसीबी) अखेर “इंडियन एजंट” वादावर आपले मौन सोडले आहे. बोर्डाने त्यांच्या संचालकांपैकी एक एम. नझमुल इस्लाम यांनी केलेल्या टिप्पणीबद्दल दिलगिरी व्यक्त करत स्पष्ट केले आहे की अशा टिप्पण्या बीसीबीच्या अधिकृत दृष्टिकोनाचे वा धोरणांचे प्रतिबिंबित करत नसल्याचे म्हटले आहे.
बीसीबीचे संचालक एम. नझमुल इस्लाम यांनी माजी कर्णधार तमीम इक्बाल यांच्याबद्दल आक्षेपार्ह टिप्पणी करून त्यांना “भारतीय एजंट” म्हटले. या विधानामुळे देशभरात निदर्शने सुरू झाली. खेळाडू, माजी क्रिकेटपटू आणि चाहत्यांनी या टिप्पण्यांना “अत्यंत लज्जास्पद” म्हटले. त्यानंतर, क्रिकेटर्स वेल्फेअर असोसिएशन ऑफ बांगलादेश (सीडब्ल्यूएबी) ने देखील कडक भूमिका घेतली असून, एम. नझमुल इस्लाम यांच्या राजीनाम्याची मागणी केली आहे.
बांगलादेश क्रिकेट बोर्डाने (बीसीबी) अलिकडच्या वादावर अधिकृत निवेदन जारी केले आहे, ज्यामध्ये असे म्हटले आहे की अशा प्रकारच्या टिप्पण्या बोर्डाच्या मूल्यांचे आणि तत्त्वांचे प्रतिबिंबित करत नाहीत किंवा बांगलादेश क्रिकेटच्या अधिकृत विचारांचे प्रतिनिधित्व करत नाहीत. बांगलादेश क्रिकेटची सेवा करण्याची जबाबदारी सोपवलेल्यांकडून सन्मान अपेक्षित आहे.
बोर्डाने असेही स्पष्ट केले की संचालक वा सदस्याचे कोणतेही विधान, जोपर्यंत अधिकृत प्रवक्ते किंवा मीडिया विभागाद्वारे जारी केले जात नाही, तोपर्यंत ते बोर्डाचे मत मानले जाऊ नये. अशी विधाने वैयक्तिक आहेत.
खेळाडूंच्या आदरावर भर
बीसीबीने असेही म्हटले आहे की ते देशातील सर्व क्रिकेटपटूंचा, मग ते सध्याचे असोत किंवा माजी, पूर्ण आदर करते. या निवेदनात खेळाडू बांगलादेश क्रिकेटचा कणा आहेत आणि त्यांची प्रतिष्ठा, सुरक्षितता आणि भविष्य हे बोर्डाचे सर्वोच्च प्राधान्य आहे, याचा पुनरुच्चार करण्यात आला आहे.
तमिम इक्बाल काय म्हणाले?
तमिम इक्बाल यांनी हे वादग्रस्त विधान केले नाही, तर त्याऐवजी भारत आणि बांगलादेशमधील सध्याचा तणाव संवादाद्वारे सोडवण्याचे आवाहन केले. बीसीसीआयच्या सूचनेनुसार कोलकाता नाईट रायडर्सने बांगलादेशी वेगवान गोलंदाज मुस्तफिजूर रहमानला आयपीएल २०२६ साठी रिलीज केल्यावर हा तणाव वाढला.
दि. ९ जानेवारी रोजी, ढाका येथे झिया इंटर-युनिव्हर्सिटी क्रिकेट टूर्नामेंट ट्रॉफी अनावरण दरम्यान, तमिम म्हणाला की सार्वजनिक विधाने करण्यापूर्वी अशा संवेदनशील बाबींवर बोर्डात चर्चा केली पाहिजे. बांगलादेश क्रिकेटचे भविष्य अत्यंत महत्त्वाचे आहे आणि ते लक्षात घेऊन निर्णय घेतले पाहिजेत असेही ते म्हणाले.
खेळाडूंकडून खुले समर्थन
एम. नझमुल इस्लाम यांच्या टिप्पण्यांनंतर, अनेक वरिष्ठ खेळाडूंनी तमिम इक्बालच्या समर्थनार्थ सोशल मीडियावर पोस्ट केली. मोमिनुल हक, तस्किन अहमद आणि तैजुल इस्लाम सारख्या खेळाडूंनी स्पष्टपणे सांगितले की तमिमचा अपमान करणे हा संपूर्ण बांगलादेश क्रिकेट संघाचा अपमान आहे.
टी-२० विश्वचषकावरही झाला परिणाम
या वादात, भारतातील टी-२० विश्वचषकाबाबत अनिश्चितता कायम आहे. खेळाडूंच्या सुरक्षेच्या कारणास्तव, बीसीबीने आयसीसीला त्यांचे सामने भारताबाहेर हलविण्याची विनंती केली होती, परंतु आयसीसीने ही विनंती नाकारली आहे.
