Paldhi Accident : महिन्याभरापूर्वी घेतलेल्या कारच्या लकी-ड्रॉची माहिती घेऊन परतणाऱ्या दोघांचा अपघातात दुर्दैवी मृत्यू झाल्याची घटना पाळधीनजीक सावदे-रिंगणगाव फाट्यावर घडली. देशमुख चुनीलाल राठोड (वय 55 रा. निपाणी तांडा ता. एरंडोल) व त्यांचा नातू परेश दिनेश राठोड (वय 6 वर्ष) असे मृत दोघांचे नाव आहे.
निपाणी तांडा येथील देशमुख चुनीलाल राठोड (वय 55) हे नातू परेश दिनेश राठोड (वय 6 वर्ष) सोबत महिन्याभरापूर्वी घेतलेल्या कारच्या लकी-ड्रॉची माहिती घेऊन परतत होते.
दरम्यान, त्यांच्या दुचाकी क्रमांक (एम.एच 19 आर 1642) ला पाळधीनजीक सावदे-रिंगणगाव फाट्यावर भरधाव कंटेनर (एमएच 05 एम 3248) ने धडक दिल्याने आजोबा आणि नातवाचा जागीच मृत्यू झाला.
देशमुख राठोड यांनी आपल्या कुटुंबासाठी महिन्याभरापूर्वी नवीन कार खरेदी केली होती. मात्र, कुटुंबात नवीन कारचा आनंद असताना महिनाभरातच काळाने आजोबा-नातवाला हिरावून घेतलं.
घटनेची माहिती मिळताच त्यांच्या कुटुंबासह ग्रामस्थ ग्रामीण रुग्णालयात पोहोचले. वडील व मुलगा गमावलेल्या दिनेश राठोड यांना दुःख अनावर झाले. दोघांचाही मृतदेह बघताच राठोड कुटुंबाने एकच आक्रोश केला.
