T20 World Cup 2026 : २०२६ च्या टी२० विश्वचषकापूर्वी, न्यूझीलंड क्रिकेट संघाला मोठा धक्का बसला आहे. गोलंदाज अॅडम मिल्ने दुखापतीमुळे वर्ल्ड कप स्पर्धेतून बाहेर पडला असून, त्याच्या जागी काइल जेमिसनला संधी देण्यात आली आहे.
न्यूझीलंडचे मुख्य प्रशिक्षक रॉब वॉल्टर म्हणाले, “अॅडम मिल्नेच्या दुखापतीमुळे आपण सर्वजण दुःखी आहोत. त्याने स्पर्धेची तयारी करण्यासाठी खूप मेहनत घेतली आणि ईस्टर्न केप सनरायझर्ससाठी सर्वोत्तम कामगिरी करत होता. रॉब वॉल्टरने मिल्नेची जागा घेणाऱ्या काइल जेमिसनचे कौतुक केले आणि तो एक योग्य पर्याय असल्याचे म्हटले.
वॉल्टर म्हणाला, “तो एक मेहनती खेळाडू आहे ज्याकडे चांगले कौशल्य आणि अनुभव आहे, ज्यामुळे तो या स्पर्धेसाठी उपयुक्त ठरतो. काइल आधीच भारतात आमच्यासोबत आहे हे खूप छान आहे. तो आमच्या वेगवान गोलंदाजी गटाचा एक महत्त्वाचा सदस्य आहे आणि या दौऱ्यात त्याने अपवादात्मक कामगिरी केली आहे.”
सध्या भारताच्या व्हाईट-बॉल दौऱ्याचा भाग असलेल्या जेमिसनला टी-२० विश्वचषक संघात समाविष्ट करण्यात आले आहे. त्याची यापूर्वी विश्वचषक संघात राखीव खेळाडू म्हणून निवड करण्यात आली होती. ३१ वर्षीय उजव्या हाताचा वेगवान गोलंदाज काइल जेमिसनने न्यूझीलंडसाठी २४ टी-२० सामने खेळले आहेत, ज्यामध्ये त्याने २३ विकेट्स घेतल्या आहेत.
