Jalgaon news: तालुक्यातील नारोद येथील सख्ख्या भावाने व्यसनाधीन भावाला गुळ नदीवरील के.टी.बंधाऱ्यावरून ढकलून गळा दाबून डोक्यात दगड मारून ठार केल्याची धक्कादायक घटना घडली. आई वडील व परिवारातील सदस्यांना दारूच्या नशेत तर्र होऊन वारंवार त्रास देण्याच्या प्रकाराला कंटाळून मोठ्या भावाने छोट्या भावाचा दुर्दैवी घात केला आहे. या घटनेने गावभर प्रचंड खळबळ उडाली असून अडावद ग्रामीण पोलिसात गुन्हा नोंदविण्यात आला आहे.
याबाबत पोलीस सूत्रांकडून प्राप्त माहिती अशी की, नारद येथील रहिवासी रोहन पानाचंद पाटील (वय 23वर्षे) हा घरात रोजच दारू पिऊन, गांजा ओढून नशेत धूत्त होत परिवारात धिंगाणा घालून मानसिक त्रास देत होता.तसेच जुगार खेळण्यासाठी पैसे दिले नाहीत तर आरडाओरडा करून भाऊ सुनील व त्यांच्या पत्नीच्या अंगावर धावून जात होता. या जाचाला कंटाळून मोठा भाऊ सुनील याने मनात राग धरून तो नशेत असतांना संधी साधत रोहन यास गुळ नदी पात्रात केटी बंधाऱ्यात ढकलून खाली पाडल्यानंतर गळा दाबून डोक्यात दगड मारून ठार केले.
दरम्यान नदीपात्रात युवकाचा मृतदेह आढळून आल्याने बघ्यांनी पोलीस पाटील विजय पाटील यांना घटनेची माहिती दिली. त्यांनी पोलिसांना कळविले असता, पोलिसांनी घाता-पाताच्या संशयावरून तपास सुरू केला असता सुनीलच्या चेहऱ्यावरील काटेरी झुडपे यांचे व्रण आढळून आल्याने त्यास पोलिसी खाक्या दाखवताच त्याने गुन्ह्याची कबुली दिली.
याप्रकरणी पोलिसात मृताची आई राधाबाई पानानंद पाटील (वय 50 वर्षे )यांच्या तक्रारीवरून अडावद पोलिसात सीसीटीएनएस गुरनं 60/2026 भारतीय न्याय संहिता कलम 103( 1) प्रमाणे गुन्हा नोंदविण्यात आला आहे.घटनास्थळी एसडीपीओ अण्णासाहेब घोलप यांनी भेट दिली. पुढील तपास सहाय्यक पोलीस निरीक्षक प्रमोद वाघ हे करीत आहेत.
