Jalgaon News: जळगाव शहराचा वाढता विस्तार लक्षात घेऊन शहरातील आर्थिकदृष्ट्या दुर्बल घटकांसाठी म्हाडातर्फे ममुराबाद रस्त्यावर १४४ घरांची सहा मजली इमारत उभारली जाणार आहे. ३१ गुंठे शासकीय भूखंडावर पंतप्रधान आवास योजनेअंतर्गत हा प्रकल्प उभारला जात असून निविदा प्रक्रिया लवकरच काढली जाणार आहे.
जळगाव शहरातील आर्थिकदृष्ट्या दुर्बल आणि कमी उत्पन्न गटातील नागरिकांना परवडणाऱ्या घरांची सुविधा उपलब्ध करून देण्यासाठी जिल्हा प्रशासनाने महत्त्वाची पावले उचलली आहे. त्यासाठी शहरालगतच्या ममुराबाद रस्त्यावर सुमारे ३१ गुंठे शासकीय जमीन महाराष्ट्र गृहनिर्माण व क्षेत्र विकास प्राधिकरणाकडे (म्हाडा) यापूर्वीच हस्तांतरित करण्यात आली आहे. तसेच त्या ठिकाणी पंतप्रधान आवास योजनेअंतर्गत तब्बल १४४ कुटुंबांसाठी सहा मजली निवासी इमारत उभारण्यात येणार आहे.
जळगाव शहरातील आर्थिक दुर्बल घटकांसाठी निवासाची व्यवस्था करण्याच्या उद्देशाने म्हाडाने पावले उचलली आहेत. जळगाव शहरात पंतप्रधान आवास योजनेत मंजूर झालेल्या घरकुलांच्या बांधकामासाठी पुरेशा जागेची जी अडचण होती ती दूर झाली असून जिल्हा प्रशासनाने शहराजवळ ममुराबाद रोडवरील शासकीय भूखंडाचा निवड केली असल्याचे सूत्रांनी सांगितले. शहराच्या मध्यवर्ती भागात त्यासाठी जमीन उपलब्ध नसल्यामुळे अनेक लाभार्थ्यांच्या घरकुलांचे स्वप्न पूर्ण होऊ शकले नाही, मात्र या नव्या जागेमुळे ते स्वप्न पूर्ण होण्याच्या आशा पल्लवित झाल्या आहेत.
गट क्रमांक ४२०/अ मधील १५ गुंठे आणि गट क्रमांक ४२१/अ मधील १६ गुंठे असे एकूण सुमारे ३१ गुंठे क्षेत्र गृहनिर्माण व क्षेत्र हस्तांतरणानंतर म्हाडाकडून पुढील तांत्रिक प्रक्रिया सुरू करण्यात आली आहे. सध्या या प्रकल्पाला गती देण्यात आली असून निविदा प्रक्रिया आता शेवटच्या टप्प्यात असून, निविदा पूर्ण झाल्यानंतर घरांच्या किंमती निश्चित करून सोडत काढण्यात येणार असल्याचे विश्वसनीय सूत्रांनी दिली.
