मुंबई : मुंबई पोलिसांच्या आर्थिक गुन्हे शाखेने (EOW) एका अत्यंत अत्याधुनिक आंतरराष्ट्रीय मनी लाँडरिंग सिंडिकेटचा पर्दाफाश केला आहे. या टोळीने गरीब व गरजू लोकांचे शोषण करून १०० कोटींहून अधिक रक्कम लुटली. पोलिसांनी मुख्य आरोपी मदनलाल जैनसह अनेक बँक अधिकाऱ्यांविरुद्ध फसवणूक आणि गुन्हेगारी कट रचल्याचा गुन्हा दाखल केला आहे.
पोलीस सूत्रानुसार, आरोपींनी मंगलाल मोदीराम दवे आणि नरेश मंगलाल दवे यांना दरमहा फक्त १०,००० रुपयांचे आमिष दाखवले. त्यांच्या कागदपत्रांचा गैरवापर केला. या गरीब लोकांच्या नावावर डझनभर बनावट कंपन्या आणि बँक खाती उघडण्यात आली, ज्याद्वारे कोट्यवधींचे व्यवहार केले गेले, ज्याची प्रत्यक्ष खातेधारकांना माहितीही नव्हती.
या सिंडिकेटने ‘गीत एक्झिम प्रायव्हेट लिमिटेड’, ‘विभा इम्पेक्स’ आणि ‘पहल इम्पेक्स’ सारख्या अनेक बनावट कंपन्या तयार केल्या. कागदावर, या कंपन्यांचे पत्ते गुजरातमधील सुरतमध्ये दाखवण्यात आले होते, परंतु पोलिस तपासात तेथे कोणतेही कार्यालय किंवा व्यवसाय आढळले नाहीत. काळा पैसा बाहेर काढण्यासाठी, हिऱ्यांच्या व्यापाराच्या आणि रस्त्याच्या बांधकामाच्या नावाखाली बनावट बिले जारी करण्यात आली आणि पैसे लाँडरिंग करण्यात आले.
बँक अधिकाऱ्यांच्या संगनमताचा पर्दाफाश
पोलिसांच्या मते, बँकिंग व्यवस्थेतील काही भ्रष्ट अधिकाऱ्यांच्या मदतीशिवाय हा घोटाळा शक्य झाला नसता. तपासात असे दिसून आले की बँक कर्मचाऱ्यांनी केवायसी नियमांचे उल्लंघन केले आणि प्रत्यक्ष पडताळणीशिवाय खाती उघडण्यास परवानगी दिली. आरोपींनी निधीचा स्रोत लपविण्यासाठी “सर्कुलर व्यवहार” केले आणि मोठ्या प्रमाणात रक्कम परदेशात हस्तांतरित केली.
ईडी इनपुटवर आधारित कारवाई
सक्तवसुली संचालनालयाच्या (ईडी) इनपुटनंतर मुंबई पोलिसांनी ही कारवाई सुरू केली. भारतीय दंड संहितेच्या कलम ४०९, ४६७, ४६८, ४७१ आणि १२०-ब अंतर्गत गुन्हा दाखल करण्यात आला आहे. दरम्यन, येत्या काही दिवसांत या रॅकेटमध्ये सहभागी असलेल्या इतर पांढरपेशा गुन्हेगारांनाही अटक होण्याची शक्यता आहे.
