Venezuela Earthquake: व्हेनेझुएलात सर्वात मोठा भूकंप झाला असून रिश्टरस्केलवर त्यांची ७.२ आणि ७.५ तीव्रता असून हा भूकंप गेल्या शतकाभरातील व्हेनेझुएलाला बसलेला सर्वात शक्तिशाली भूकंप होता आणि त्यांची तीव्रता संपूर्ण परिसरात जाणवली. व्हेनेझुएलाचे आरोग्यमंत्री कार्लोस अल्वाराडो यांच्या माहितीनुसार, २३५ लोकांचा मृत्यू झाला असून ४,३०० लोक जखमी झाले आहे. रुग्णालये “रुग्णांनी भरून गेली आहेत.” तसेच, शेकडो लोक ढिगाऱ्याखाली अडकले असण्याची शक्यता आहे.
बुधवारी झालेल्या दोन विनाशकारी भूकंपांनंतर कोसळलेल्या इमारतींखाली अडकलेल्या लोकांना शोधण्याच्या तातडीच्या मोहिमेत आंतरराष्ट्रीय बचाव पथके सहभागी झाली आहेत रुग्णालये रुग्णांनी भरून जात असतानाच. अमेरिकन खंडातील विविध देशांतून बचाव पथके आणि मानवतावादी मदत मोठ्या प्रमाणावर पोहोचत आहे. ब्राझील, कॅनडा, मेक्सिको, कोलंबिया, अल साल्वाडोर, क्युबा आणि अमेरिका यांसारख्या अमेरिकन खंडातील देशांनी, तसेच संयुक्त राष्ट्रांनी, भूकंपांनंतरही शुक्रवारी शोध व बचाव पथके आणि मानवतावादी मदत पाठवणे सुरूच ठेवले. प्रशासनाने मृतांच्या संख्येत वाढ होऊन २३५ इतका गेला असल्याचे सांगितले आहे.
“व्हेनेझुएलाच्या जनतेला आणि ज्यांचे प्रियजन ढिगाऱ्याखाली अडकले आहेत त्यांना मी सांगू इच्छितो की, तुमच्यापर्यंत मदत पोहोचवण्यासाठी आम्ही कटिबद्ध आहोत,” असे संयुक्त राष्ट्रांचे मदत प्रमुख टॉम फ्लेचर यांनी म्हटले, असे वृत्त असोसिएट प्रेसच्या हवाल्याने अल जंजिराने दिले आहे.
‘आम्ही सर्व काही गमावले’
राजधानी काराकसच्या उत्तरेकडील ‘ला गुएरा’ (La Guaira) या किनारपट्टीवरील राज्यात सर्वाधिक नुकसान झाले आहे. या राज्यात १०० हून अधिक इमारती कोसळल्या असून किमान ७०,००० कुटुंबे बाधित झाली आहेत, असे व्हेनेझुएलाचे गृहमंत्री डायओसदादो कॅबेलो यांनी सांगितले. याच भागात व्हेनेझुएलाचे मुख्य आंतरराष्ट्रीय विमानतळही आहे, जे नुकसानीमुळे बंद करण्यात आले आहे. ला गुएरा शहरात, बेपत्ता नातेवाईकांच्या बातम्यांची वाट पाहणाऱ्या कुटुंबांच्या उपस्थितीत स्वयंसेवक उघड्या हातांनी ढिगारा उपसत होते. काराकस-ला गुएरा महामार्गावरून नागरिक पाणी, अन्न आणि औषधे घेऊन किनारपट्टीच्या दिशेने जात होते; सुरुवातीच्या बचाव कार्यावर आपत्तीच्या प्रचंड व्याप्तीचा ताण आल्याने हे नागरिक मदतीसाठी पुढे सरसावले.
“आम्ही सर्व काही गमावले आहे. आमच्याकडे अन्न किंवा औषधे नाहीत. आम्हाला आशा आहे की मदत लवकर पोहोचेल,” असे ६४ वर्षीय पेड्रो पेरेझ यांनी सांगितले. फर्निचर दुरुस्तीचे (अपहोल्स्ट्री) दुकान चालवणाऱ्या पेरेझ यांनी सांगितले की, त्यांनी आपले घर आणि व्यवसाय दोन्ही गमावले असून ते पत्नी आणि मुलांसह रस्त्यावर झोपत आहेत. कॅराकसमध्येही भीती आणि विध्वंसाचे दृश्य पाहायला मिळाले; तिथे आणखी इमारती कोसळण्याच्या भीतीने अनेक लोकांनी रस्त्यावर किंवा आपल्या गाड्यांमध्ये रात्र काढली.
“लोकांना त्यांच्या घरात परत जाण्याची भीती वाटत आहे,” असे पत्रकार मारिया एमिलिया मिरो क्वेसाडा यांनी कॅराकसवरून ‘अल जझीरा’ला सांगितले. “इमारतींची स्थिती आणि झालेले नुकसान याबद्दल त्यांच्या मनात मोठी अनिश्चितता आहे.”
अनेक वर्षांपासून सुरू असलेली आर्थिक पडझड आणि कमकुवत झालेली पायाभूत सुविधांची व्यवस्था यामुळे या आपत्तीनंतर व्हेनेझुएलाच्या सावरण्याच्या प्रक्रियेत अडथळे येत आहेत. शेजारील कोलंबियातील बोगोटा येथून बातमी देताना ‘अल जझीरा’चे अलेस्ँड्रो रॅम्पिएटी म्हणाले की, भूकंपापूर्वीच व्हेनेझुएलाची परिस्थिती अत्यंत कठीण होती; तिथे वारंवार वीजपुरवठा खंडित होत होता आणि सार्वजनिक सेवांची अवस्था “अत्यंत दयनीय” झाली होती. अनेक रुग्णालये आधीच त्यांच्या क्षमतेपेक्षा कमी पातळीवर काम करत होती… त्यांच्याकडे आवश्यक असलेले पुरेसे अभियंते आणि डॉक्टर उपलब्ध नाहीत.”
अमेरिकन खंडातील देशांचा प्रतिसाद
अमेरिकेने जानेवारीत व्हेनेझुएलाचे राष्ट्राध्यक्ष निकोलस मादुरो यांना ताब्यात घेण्याच्या उद्देशाने एक लष्करी मोहीम राबवली होती, आता “संपूर्ण सरकारी यंत्रणेद्वारे प्रतिसाद” (whole-of-government response) देण्याचे आश्वासन दिले आहे. यामध्ये युद्धनौका, मालवाहू विमाने आणि हेलिकॉप्टर्स तैनात करण्याच्या तसेच १५० दशलक्ष डॉलर्सची मदत उभारण्याच्या योजनांचा समावेश आहे. अमेरिकेचे परराष्ट्र मंत्री मार्को रुबिओ यांनी सांगितले की, हा प्रतिसाद “मोठा, जलद आणि प्रभावी” असेल म्हटले आहे.
*ब्राझीलचे राष्ट्राध्यक्ष लुईझ इनासिओ लुला दा सिल्वा यांनी एक ‘फील्ड हॉस्पिटल’ (तात्पुरते रुग्णालय) तसेच डझनभर अग्निशमन दलाचे जवान आणि इतर मदतनीस पाठवण्याची घोषणा केली.
*एल साल्वाडोरचे राष्ट्राध्यक्ष नायब बुकेले यांनी सांगितले की, त्यांनी ३०० बचावकर्ते व वैद्यकीय मदतनीस (पॅरामेडिक्स) आणि ५० टन उपकरणे, औषधे व जीवनावश्यक वस्तू सज्ज ठेवल्या आहेत.
*हवाना येथील परराष्ट्र मंत्री ब्रुनो रॉड्रिग्ज यांनी सांगितले की, क्युबन आरोग्य कर्मचारी आधीच “पूर्णपणे सज्ज झाले आहेत आणि बाधित लोकांना वैद्यकीय सेवा पुरवत आहेत.”
*मेक्सिकोच्या राष्ट्राध्यक्ष क्लॉडिया शिनबॉम यांनी सांगितले की, त्यांचा देश बचावकर्ते आणि वैद्यकीय कर्मचाऱ्यांचे एक लष्करी पथक पाठवत आहे आणि गरज पडल्यास आणखी मदतही पाठवली जाईल.
*कोलंबिया जिथे भूकंपाचे धक्केही जाणवले होते, त्यांनी आपल्या शेजारील देशाला ६० हून अधिक बचावकर्ते आणि १२ टन मानवतावादी मदत पाठवणार असल्याचे त्यांच्या आपत्ती व्यवस्थापन संस्थेद्वारे जाहीर केले.
*युनाटेड नेशनने देखील मदत पोहचविण्यासाठी तयारी केली असून त्यांचे स्वयंसेवक लवकरच दाखल होणार आहे. जगभरातून व्हेनेझुएलाला मदत हात देत आहेत
