Russia Ukrain War: रशियाचे राष्ट्राध्यक्ष व्लादिमीर पुतिन यांनी संकेत दिले आहेत की, युक्रेनसोबतचे त्यांच्या देशाचे युद्ध ‘शेवटच्या टप्प्यात’ आले आहे आणि शांतता करार झाल्यास, त्यांचे युक्रेनियन समकक्ष व्लादिमीर झेलेन्स्की यांना तिसऱ्या देशात भेटण्याची त्यांनी तयारी दर्शवली आहे, असे रॉयटरच्या हवाल्याने अल जंजिराने वृत्त दिले आहे.
रशियाच्या आतापर्यंतच्या सर्वात लहान विजय दिन संचलनात युक्रेनवर विजय मिळवण्याचे वचन दिल्यानंतर काही तासांनी, शनिवारी पुतिन यांनी पत्रकारांशी बोलताना हे वक्तव्य केले. रशिया आणि युक्रेनने तीन दिवसांचा युद्धविराम सुरू केला आणि १,००० कैद्यांची अदलाबदल करण्यास सहमती दर्शवली आहे, त्याच वेळी हे वक्तव्य समोर आले आहे. या घडामोडींमुळे राजकीय परिस्थिती सुधारण्यास मदत होणार आहे, तरी ही सावधपणे पावले टाकावी लागणार आहे.यावेळी संचालना दरम्यान, पुतिन यांनी युक्रेनमध्ये लढणाऱ्या रशियन सैनिकांची प्रशंसा केली आणि त्यांच्या मोहिमेचे वर्णन ‘आक्रमक शक्ती’ विरुद्ध ‘एक न्याय्य कारण’ असे केले. ते म्हणाले की ही आक्रमक शक्ती ‘संपूर्ण नाटो गटाद्वारे सशस्त्र आणि समर्थित’ आहे.
मॉस्कोच्या रेड स्क्वेअरमध्ये सैनिकंसमोर बोलतांना ते पुढे म्हणाले, “विजय नेहमीच आमचा होता आणि नेहमीच आमचा राहील.” नंतर पत्रकारांशी बोलताना, पुतिन यांनी युद्धासाठी पाश्चात्य “जागतिकवादी अभिजन वर्गाला” जबाबदार धरले. ते म्हणाले की, १९८९ मध्ये बर्लिनची भिंत कोसळल्यानंतर, या लोकांनी नाटो पूर्वेकडे विस्तारणार नाही, असे वचन दिले होते, परंतु नंतर युक्रेनला युरोपियन युनियनच्या प्रभावक्षेत्रात ओढण्याचा प्रयत्न केला. त्यानंतर त्यांनी घोषित केले, “मला वाटते की हे प्रकरण आता अंतिम टप्प्यात आले आहे.”
रशियाचा वार्षिक विजय दिन हा दुसऱ्या महायुद्धात नाझी जर्मनीवर सोव्हिएत युनियनने मिळवलेल्या विजयाचे स्मरण करतो आणि त्या संघर्षात मरण पावलेल्या २७ दशलक्ष सोव्हिएत नागरिकांना श्रद्धांजली अर्पण करतो. या वर्षीची परेड नेहमीपेक्षा अधिक साधी होती. रेड स्क्वेअरमधून रणगाडे आणि क्षेपणास्त्र प्रणालींच्या संचलनाऐवजी, मोठ्या पडद्यांवर लष्करी उपकरणांचे व्हिडिओ दाखवण्यात आले.
शनिवारच्या परेडमध्ये उत्तर कोरियाच्या सैन्यानेही प्रथमच भाग घेतला. युक्रेनने रशियाच्या कुर्स्क प्रदेशात केलेल्या घुसखोरीला रोखण्यासाठी मॉस्कोच्या सैन्यासोबत लढण्यासाठी आपले सैन्य पाठवणाऱ्या प्योंगयांगला ही एक श्रद्धांजली होती. सुट्टीनिमित्त रशियाने शुक्रवार आणि शनिवारसाठी एकतर्फी युद्धविराम जाहीर केला होता, तर झेलेन्स्की यांनीही ६ मे पासून सुरू होणाऱ्या अशाच युद्धविरामाची घोषणा केली होती. तथापि, दोन्हीपैकी कोणताही युद्धविराम सध्या लागू करण्यात आलेला नाही.
