Nashik News:(Nashik Road) नाशिक रोड प्रभाग क्रमांक २२ मधील विहितगाव व बागुल नगर परिसरातील सांडपाणी, पिण्याच्या पाण्याची टंचाई व सुलभ शौचालयांच्या दुरावस्थेबाबत महापालिकेच्या नाशिक रोड विभागीय कार्यालयाबाहेर स्थानिक महिलांनी ठिय्या आंदोलन केले. प्रभाग २२ हा कायम समस्यांनी ग्रस्त राहिला आहे. पाणी, स्वच्छता, पायाभूत सुविधांपासून वंचित असलेल्या या परिसराला न्याय द्यावा अशी मागणी आंदोलनकर्त्यांनी केली.
यावेळी दिलेल्या निवेदनाचा आशय असा- विहितगाव व बागुल नगर परिसरामध्ये आरोग्याच्या गंभीर समस्या आहेत. परिसरातील ड्रेनेज लाईन पूर्णपणे भरलेली असून सांडपाणी रस्त्यावर व घरांच्या आसपास साचत आहे. दुर्गंधीमुळे नागरिकांचे आरोग्य धोक्यात आले आहे, परिसरामध्ये पिण्याच्या पाण्याची तीव्र टंचाई असून नागरिकांचे हाल होत आहेत. सुलभ शौचालयांची प्रचंड दुरावस्था झाली आहे. स्वच्छतेचा पूर्ण अभाव दिसून येत आहे. नागरिकांचे आरोग्य हे धोक्यात आले आहे.
ड्रेनेज लाईनची तत्काळ स्वच्छता व दुरूस्ती करावी, परिसरात नियमित व पुरेसा पाणीपुरवठा सुरू करावा. सुलभ शौचालयांची स्वच्छता, दुरूस्ती व देखभाल करावी. आवश्यक उपाययोजना करावी अन्यथा तीव्र आंदोलन करण्यात येईल. असा इशारा सलिम शेख, संगीता चव्हाण, सिध्दार्थ दोंदे, राधिका कसबे, अशोक बागुल, नसरिन शेख, हाजरा खान, सचिन भुसे आदींनी दिला.
