Monsoon Care: राज्यात ठिकठिकाणी कमी अधीक प्रमाणात पावसाची हजेरी लागत आहे. काही ठिकाणी तर मुसळधार पाऊस झाला. पाऊस शेतकऱ्यांसह सर्वांना दिलासा देणारा असला तरी या काळात आर्द्रता वाढल्याने जिवाणू, विषाणू आणि बुरशीची वाढ झपाट्याने होते, त्यामुळे विषाणूजन्य ताप, डेंग्यू, मलेरिया, टायफॉइड, अन्नातून विषबाधा आणि पोटाशी संबंधित समस्यांचा धोका वाढतो. अशा वेळी आरोग्याची विशेष काळजी घेणे गरजेचे आहे. चला तर मग, जाणून घेऊया सुदृढ आरोग्यासाठी पावसाळ्यात काय काळजी घेतली पाहीजे.
पावसाळ्यात अशी घ्या आरोग्याची काळजी
उकळलेले किंवा गाळलेले पाणी प्या
पावसाळ्यात पाणी मोठ्या प्रमाणात दूषित होते. दूषित पाण्यामुळे आरोग्याच्या अनेक समस्या निर्माण होतात. त्यामुळे नेहमी उकळलेले किंवा गाळलेले पाणी प्या. उघडे पाणी प्यायल्याने पोटदुखी, टायफॉइड आणि अतिसार होऊ शकतो.
हात स्वच्छ धुवा
जेवण्यापूर्वी आणि बाहेरून आल्यानंतर आपले हात साबणाने किमान 20 सेकंद धुवा. यामुळे जिवाणू आणि विषाणूजन्य संसर्ग कमी होतो.
आहारात फळांचा समावेश
पावसाळ्यात रोगप्रतिकारशक्ती मजबूत राहणे गरजेचे आहे. रोगप्रतिकारशक्ती वाढवण्यासाठी आपल्या आहारात व्हिटॅमिन सी युक्त फळे, हिरव्या भाज्या, हळद, आले, लसूण आणि दही यांचा समावेश करा. हे तुमच्या शरीराची रोगप्रतिकारशक्ती वाढवण्यास मदत करतात.
ताजे आणि घरगुती जेवण खा
पावसाळ्यात शिळे, उघडे आणि रस्त्यावरील अन्नपदार्थ खाणे टाळा. कारण अशा अन्नातून विषबाधा आणि पोटाच्या समस्यांचा धोका निर्माण होऊ शकतो.
डासांपासून स्वतःचे संरक्षण करा
पावसाळ्यात आपल्या घराभोवती पाणी साचू देऊ नका. डेंग्यू आणि मलेरियासारख्या आजारांना प्रतिबंध करण्यासाठी मच्छरदाणी, डास प्रतिबंधक आणि लांब बाह्यांचे कपडे वापरा.
ओले झाल्यावर लगेच कपडे बदला.
पावसात भिजल्यानंतर ओले कपडे जास्त वेळ घालू नका. यामुळे सर्दी, बुरशीजन्य संसर्ग आणि त्वचेच्या समस्या उद्भवू शकतात.
पुरेशी झोप घ्या.
दररोज 7-8 तास चांगली झोप घेतल्याने शरीर लवकर बरे होण्यास मदत होते आणि संसर्गाशी लढण्याची त्याची क्षमता वाढते.
नियमित व्यायाम आणि योगा करा.
हलका व्यायाम, योगा आणि प्राणायाम शरीराला सक्रिय ठेवतात आणि रोगप्रतिकारशक्ती मजबूत करण्यास मदत करतात.
स्वच्छतेकडे विशेष लक्ष द्या.
तुमचे घर, स्वयंपाकघर आणि स्नानगृह स्वच्छ ठेवा. धूळ आणि ओलाव्यामुळे जिवाणू आणि बुरशीचा झपाट्याने प्रसार होऊ शकतो.
लक्षणे जाणवल्यास डॉक्टरांशी संपर्क साधा
जर तुम्हाला तीव्र ताप, सतत उलट्या, जुलाब, अंगदुखी किंवा श्वास घेण्यास त्रास होत असेल, तर घरगुती उपायांवर अवलंबून राहू नका आणि वैद्यकीय सल्ला घ्या.
