विरोधीपक्ष नेते खा. राहुल गांधी यांचा पंतप्रधानांच्या निवासस्थानावर मोर्चा; रुग्णालयात जाऊन विद्यार्थ्यांची ही घेतली भेट

Congress Protest: ‘कॉकरोच जनता पार्टी’च्या संसद मोर्चाला हिंसक वळण लागल्याच्या दुसऱ्याच दिवशी, अनेक नेत्यांनी संघर्षात जखमी झालेल्यांची भेट घेतली. केंद्रीय आरोग्य मंत्री जे.पी. नड्डा यांनी दिल्लीतील राम मनोहर लोहिया (आरएमएल) रुग्णालय आणि लेडी हार्डिंग मेडिकल कॉलेज व रुग्णालयाला भेट दिली. दरम्यान, काँग्रेस नेते राहुल गांधी आणि प्रियांका गांधी वद्रा यांनी आरएमएल रुग्णालयात जखमी विद्यार्थ्यांची भेट घेतली. तसेच प्रकृतीची विचारपूस केली आणि ते लवकर बरे व्हावेत यासाठी सदिच्छा व्यक्त केल्या.

राहुल गांधी म्हणाले..

काँग्रेस खासदार राहुल गांधी यांनी इंस्टाग्रामवरील एका पोस्टमध्ये म्हटले आहे, “काल तरुण विद्यार्थ्यांवर झालेल्या अत्याचाराबद्दल पंतप्रधान मोदींकडून उत्तर मागण्यासाठी आम्ही पायी मोर्चा त्यांच्या घरापर्यंत काढला. सरकारला ना कोणतीही जबाबदारी घ्यायची आहे, ना संसदेत यावर चर्चा करायची आहे. भारताच्या तरुणांचे भविष्य उद्ध्वस्त केल्याबद्दल पंतप्रधान आणि गृहमंत्री यांनी राजीनामा द्यावा.” अशी मागणी त्यांनी केली आहे.

कॉग्रेसचे आंदोलन

लोकसभेतील विरोधी पक्षनेते आणि काँग्रेस खासदार राहुल गांधी यांनी मंगळवारी दिल्लीतील लोक कल्याण मार्गावर आंदोलन केले. या आंदोलनात वायनाडच्या खासदार प्रियांका गांधी, मल्लिकार्जुन खर्गे आणि के.सी. वेणुगोपाल यांच्यासह पक्षाचे अनेक नेते सहभागी झाले होते. काँग्रेस नेत्यांनी पंतप्रधान नरेंद्र मोदी आणि शिक्षण मंत्री धर्मेंद्र प्रधान यांच्या राजीनाम्याची मागणी करत घोषणाबाजी केली. जंतर मंतर ते संसद मोर्चावर झालेल्या लाठीचार्जच्या निषेधार्थ काँग्रेस नेत्यांनी हे आंदोलन केल्याचे म्हटले आहे.

पोलिसांनी काँग्रेस नेत्यांना घेतले ताब्यात

आंदोलनादरम्यान दिल्ली पोलिसांनी अनेक काँग्रेस नेत्यांना ताब्यात घेतले. दिल्ली पोलिसांनी काँग्रेस खासदार के. सुरेश आणि पंजाबचे माजी मुख्यमंत्री चरणजीत सिंग चन्नी यांच्यासह अनेक नेत्यांना ताब्यात घेतले आहे. कॉकरोच जनता पक्षाच्या संसद मोर्चादरम्यान झालेल्या लाठीचार्जच्या दुसऱ्या दिवशी काँग्रेस खासदार राहुल गांधी आणि प्रियांका गांधी वद्रा यांनी आरएमएल रुग्णालयात जाऊन जखमी विद्यार्थ्यांची भेट घेतली.

सूत्रांनुसार, राहुल गांधी आणि प्रियांका गांधी यांनी आरएमएल रुग्णालयात व्हेंटिलेटरवर असलेल्या जखमी मुलीच्या आईचीही भेट घेतली. ‘एक्स’ या सोशल मीडिया प्लॅटफॉर्मवरील एका पोस्टमध्ये काँग्रेसने म्हटले आहे की, राहुल गांधी आणि प्रियांका गांधी यांनी पक्षाचे संघटन सरचिटणीस (के) सी. वेणुगोपाल यांच्यासह सोमवारी झालेल्या युवा आंदोलनादरम्यान झालेल्या “पोलीस अत्याचार आणि लाठीचार्ज” मध्ये जखमी झालेल्या विद्यार्थ्यांची भेट घेतली.