Jalgaon News: महाराष्ट्र बॉक्सिंग असोसिएशनतर्फे भद्रावती, चंद्रपूर येथे इंटर क्लब युथ (U-19) मुले व मुलींची महाराष्ट्र राज्यस्तरीय निवड चाचणी स्पर्धा 10 ते 12 ऑगस्ट दरम्यान घेण्यात आली. या स्पर्धेत जळगावची कु. माहेश्वरी दिनेश चोपडे हिने 70 ते 75 किलो वजनगटात उत्कृष्ट कामगिरी करत प्रथम क्रमांक पटकावला. या कामगिरीच्या जोरावर तिची महाराष्ट्र बॉक्सिंग संघात निवड झाली असून, आता ती पटियाला येथे होणाऱ्या भारतीय संघाच्या निवड चाचणी स्पर्धेत महाराष्ट्राचे प्रतिनिधित्व करणार आहे. या निवडीबद्दल तिचे सर्वत्र अभिनंदन होत आहे.
बॉक्सिंग फेडरेशन ऑफ इंडियातर्फे युथतर्फे मुले व मुलींच्या भारतीय बॉक्सिंग संघासाठी निवड चाचणी स्पर्धा 27 ते 31 ऑगस्टदरम्यान पटियालातील पंजाब येथे होणार आहे. या स्पर्धेत विजयी ठरणाऱ्या खेळाडूंना जकार्ता, इंडोनेशिया येथे होणाऱ्या आंतरराष्ट्रीय स्पर्धेत भारताचे प्रतिनिधित्व करण्याची संधी मिळणार आहे.
माहेश्वरी सध्या अकोला येथील महाराष्ट्र शासनाच्या क्रीडा प्रबोधिनी केंद्रात सराव करत आहे. तिला जळगाव येथील खेलो इंडिया बॉक्सिंग प्रशिक्षण केंद्राचे प्रशिक्षक निलेश बाविस्कर यांचे मार्गदर्शन लाभत आहे. माहेश्वरी चोपडेच्या निवडीबद्दल जळगाव जिल्हा क्रीडा अधिकारी दिलीप दिघे, एकलव्य क्रीडा संकुलाचे संचालक डॉ. श्रीकृष्ण बेलोरकर, बॉक्सिंग पदाधिकारी डॉ. अमोल पाटील, धनराज कसाट, नरेंद्र मोरे, नयन राणे, रोहिदास पाटील, विशाल बाविस्कर, चुनिलाल गुप्ता, दीपक वाल्डे, रवी नरवाडे आणि संतोष सुरवाडे यांनी अभिनंदन करून तिच्या पुढील वाटचालीस तिला शुभेच्छा दिल्या.
