Jalgaon News: दिवंगात माजी उपमुख्यमंत्री अजितदादा पवार यांच्या जयंतीनिमित्त तसेच मुख्यमंत्री देवेंद्र फडणवीस यांच्या वाढदिवसानिमित्त शासकीय वैद्यकीय महाविद्यालय व रुग्णालय, जळगाव यांच्यावतीने आज म्हणजेच 22 जुलै ते 29 जुलै 2026 या कालावधीत सर्वसामान्य जनतेसाठी महाआरोग्य शिबिराचे आयोजन करण्यात आले आहे.
या महाआरोग्य शिबिराचा शुभारंभ आज सकाळी 10:30 वाजता शासकीय वैद्यकीय महाविद्यालय व रुग्णालय, जळगाव येथील बाह्यरुग्ण इमारतीसमोर झाला. महाआरोग्य शिबिरांतर्गत शरीरविकृतीशास्त्र विभागामार्फत रक्तदान शिबिरे, शल्यचिकित्साशास्त्र विभागामार्फत स्तन कर्करोग तपासणी शिबिर, स्तन कर्करोग जनजागृती शिबिर, संशयित रुग्णांची बायोप्सी तपासणी तसेच स्तन कर्करोग विषयावरील वैद्यकीय पदव्युत्तर विद्यार्थ्यांची पोस्टर स्पर्धा आयोजित करण्यात येणार आहे.
स्त्रीरोग व प्रसूतीशास्त्र विभागामार्फत गर्भाशय मुख कर्करोग तपासणी (पॅप्स स्मिअर) शिबिर, ह्युमन पॅपिलोमा व्हायरस (एचपीव्ही) संक्रमण व लसीकरण जनजागृती शिबिर तसेच गर्भाशय मुख कर्करोग विषयावरील पथनाट्य सादर करण्यात येणार आहे.
अस्थिव्यंगोपचारशास्त्र विभागामार्फत अस्थी ठिसूळता तपासणी (बोन मिनरल डेन्सिटी) शिबिर, कान-नाक-घसा व दंत शल्यचिकित्साशास्त्र विभागामार्फत मुख कर्करोग तपासणी शिबिर, नेत्रशल्यचिकित्साशास्त्र विभागामार्फत नेत्र तपासणी व मोतिबिंदू शस्त्रक्रिया शिबिर, औषधवैद्यकशास्त्र विभागामार्फत स्थूलता व उच्च रक्तदाब तपासणी शिबिर आयोजित करण्यात येणार आहे.
याशिवाय, जनऔषधवैद्यकशास्त्र विभागामार्फत हर्निया जनजागृती अभियान, व्हेरिकोज व्हेन्स जनजागृती अभियान, मुख कर्करोग जनजागृती अभियान, थॅलेसेमिया जनजागृती अभियान, टाइप-१ मधुमेह (Type-1 Diabetes Mellitus) जनजागृती अभियान, कृत्रिम अवयव व पुनर्वसन जनजागृती अभियान तसेच स्थूलता या व्याधीवर सामाजिक जनजागृतीसाठी रील बनविण्याची स्पर्धा आयोजित करण्यात आली आहे.
महाआरोग्य शिबिराचा लाभ जास्तीत जास्त नागरिकांनी घ्यावा, असे आवाहन शासकीय वैद्यकीय महाविद्यालय व रुग्णालयाचे अधिष्ठाता डॉ. गिरिष ठाकूर यांनी केले आहे.
