Kolkata News: कोलकाता येथील चोरबागान दुर्गा पूजा मंडप कोसळण्याच्या संभाव्य धोक्याच्या इशाऱ्यानंतर झालेल्या चेंगराचेंगरीत १९ जणांचा मृत्यू झाला. प्राथमिक तपासानुसार, आयोजकांनी लाऊडस्पिकरवरून केलेली घोषणा हे या अपघाताचे संभाव्य कारण असल्याचे समोर आले आहे. या प्रकरणी सात जणांना अटक करण्यात आली असून, उच्च न्यायालयाच्या विद्यमान न्यायाधीशांच्या नेतृत्वाखाली विशेष तपास पथकाद्वारे (SIT) चौकशीची घोषणा करण्यात आली आहे. दरम्यान या चोरबागन दुर्गा पूजा मंडपातील चेंगराचेंगरीत मृत्यूमुखी पडलेल्या १९ जणांपैकी १८ जण राज्यातील विविध भागांतील होते, तर एक व्यक्ती बिहारमधील मुझफ्फरपूरची होती, असे मुख्यमंत्री सुवेंदू अधिकारी यांनी सांगितले.
१८ ऑक्टोबर रोजी शनिवारी संध्याकाळी, पश्चिम बंगालची राजधानी कोलकाता येथील चोरबागान दुर्गा पूजा मंडपाच्या स्थितीबद्दल लाऊडस्पिकरद्वारे घोषणा करून लोकांना तात्काळ बाहेर पडण्याचा इशारा देण्यात आला. या घोषणेमुळे लोकांमध्ये घबराट पसरली आणि झालेल्या चेंगराचेंगरीत १९ जणांचा मृत्यू झाला. मुख्यमंत्री सुवेंदू अधिकारी यांनी प्राथमिक तपासाचा हवाला देत सांगितले की, आयोजकांच्या घोषणेमुळेच हा अपघात घडला. आतापर्यंत सात जणांना अटक करण्यात आली आहे.
पावसापासून वाचण्यासाठी गर्दी मंडपात घुसली.
पोलिसांच्या माहितीप्रमाणे, सप्तमीच्या दिवशी झालेल्या पावसामुळे रस्ते निसरडे झाले होते. प्रत्यक्षदर्शींच्या मते, पावसापासून वाचण्यासाठी लोक चोरबागानच्या अरुंद गल्ल्यांमधून मंडपाच्या दिशेने जाऊ लागले. आत असलेले लोक पावसात बाहेर पडायला तयार नव्हते, तर प्रवेशद्वार आणि बाहेर पडण्याच्या दोन्ही ठिकाणी गर्दी वाढतच होती. या धक्काबुक्कीत काही लोक घसरून पडले, तर काही जण पडलेल्या येऊन लोकांवर पडले.
वरिष्ठ अधिकाऱ्यांवर जबाबदारी सोपवली
दरम्यान राज्याच्या सीआयडी (CID) मुख्यालयातील, भवानी भवन येथे झालेल्या उच्चस्तरीय बैठकीनंतर बोलताना, मुख्यमंत्री सुवेंदू अधिकारी यांनी सांगितले की, शवविच्छेदनाची प्रक्रिया पूर्ण झाल्यानंतर वरिष्ठ अधिकाऱ्यांच्या देखरेखीखाली मृतदेह नातेवाईकांच्या ताब्यात दिले जातील. मुख्यमंत्री म्हणाले, “आम्ही दंडाधिकारी (मॅजिस्ट्रेट) आणि डीएसपी (DSP) दर्जाच्या अधिकाऱ्यांवर मृतदेह संबंधित कुटुंबांकडे सोपवण्याची जबाबदारी दिली आहे. अंत्यसंस्कार पूर्ण होईपर्यंत हे अधिकारी त्या कुटुंबांसोबत उपस्थित राहतील.”
पंतप्रधान नरेंद्र मोदी यांनी तीव्र दुःख व्यक्त केले
ही घटना अत्यंत दुःखद असल्याचे पंतप्रधान मोदी यांनी म्हटले आहे. त्यांनी मृतांच्या कुटुंबीयांप्रति शोकसंवेदना व्यक्त केल्या असून, जखमींच्या प्रकृतीत लवकर सुधारणा व्हावी, अशी सदिच्छा व्यक्त केली आहे. या घटनेतील बाधित कुटुंबांना पश्चिम बंगाल सरकारकडून सर्वतोपरी मदत केली जात असल्याचेही पंतप्रधानांनी नमूद केले आहे.
चेंगराचेंगरीच्या या घटनेत मृत्युमुखी पडलेल्यांच्या कुटुंबीयांना पंतप्रधान राष्ट्रीय मदत निधीतून प्रत्येकी 2 लाख रुपयांचे सानुग्रह अनुदान देण्यात येणार असल्याची घोषणा पंतप्रधानांनी केली आहे. तसेच, जखमींना प्रत्येकी ५० हजार रुपयांची मदत देण्यात येणार आहे.
पंतप्रधान कार्यालयाने एक्स या सामाजिक माध्यमावरील एका संदेशात म्हटले आहे की, “कोलकात्यात झालेली चेंगराचेंगरी अत्यंत दुःखद आहे. आपल्या प्रियजनांना गमावलेल्या कुटुंबीयांच्या दुःखात मी सहभागी आहे. जखमी झालेले लवकर बरे व्हावेत, अशी सदिच्छा व्यक्त करतो. पीडितांना स्थानिक प्रशासनाकडून सर्वतोपरी मदत केली जात आहे.
अमित शाह यांची खासगी रुग्णालयाला भेट
केंद्रीय गृहमंत्री अमित शाह यांनी रविवारी सकाळी उत्तर कोलकाता येथील दुर्गा पूजा मंडपात झालेल्या चेंगराचेंगरीत जखमी झालेल्या १४ जणांवर उपचार सुरू असलेल्या खासगी रुग्णालयाला भेट दिली, अशी माहिती एका वरिष्ठ अधिकाऱ्याने दिली.
या दौऱ्यादरम्यान पश्चिम बंगालचे मुख्यमंत्री सुवेंदू अधिकारी हेदेखील शाह यांच्यासोबत होते. राज्य सरकारच्या एका अधिकाऱ्याने सांगितले की, शाह यांनी डॉक्टरांशी संवाद साधला आणि जखमींच्या उपचारांची चौकशी केली. त्या अधिकाऱ्याने सांगितले की, गृहमंत्री यांनी रुग्णालयात उपचार घेत असलेल्या तीन रुग्णांशीही संवाद साधला.
उत्तर कोलकाता येथील चोरबागान दुर्गा पूजा मंडपात शनिवारी संध्याकाळी पावसामुळे अचानक गर्दी वाढल्याने झालेल्या चेंगराचेंगरीत किमान १९ जणांचा मृत्यू झाला आणि २५ जण जखमी झाले.
