Delhi News: अमेरिका इस्रायल आणि इराण यांच्यात अद्याप तणाव कायम आहे. इराणचे हवाई क्षेत्र मालवाहू आणि चार्टर्ड विमानांसाठी अंशतः खुले झाले आहे. भारतीय नागरिकांनी इराणला प्रवास करणे टाळावे, असा सल्ला भारत सरकारतर्फे देण्यात आला आहे, आणि जे आधीपासूनच तेथे आहेत, त्यांना भारतीय दूतावासाच्या मदतीने भू-सीमा मार्गाने परत येण्याचे आवाहन करण्यात आले आहे. तेहरानमधील भारतीय दूतावासाने आतापर्यंत 2,490 भारतीय नागरिकांना भू-सीमा मार्गांने इराणमधून बाहेर पडण्यासाठी मदत केली आहे.
युद्धग्रस्त प्रदेशातून भारतातील विविध ठिकाणांसाठी अतिरिक्त विमानसेवा सुरू झाल्याने एकूण विमानसेवेची परिस्थिती सुधारत आहे. संयुक्त अरब अमिरातीमध्ये, विमान कंपन्या परिचालन आणि सुरक्षिततेच्या विचारांवर आधारित यूएई आणि भारतादरम्यान मर्यादित व्यावसायिक विमान उड्डाणे चालवत आहेत. सौदी अरेबिया आणि ओमानमधील विविध विमानतळांवरून भारतातील विविध ठिकाणांसाठी विमान उड्डाणे सुरू आहेत. कतारचे हवाई क्षेत्र अंशतः खुले झाल्याने, कतार एअरवेज भारतातील विविध ठिकाणांसाठी विमान उड्डाणे चालवत आहे.
एअर इंडिया, एअर इंडिया एक्सप्रेस आणि इंडिगो यांनी कतारहून भारतासाठी विमान उड्डाणे सुरू केली आहेत. तसेच कुवेतचे हवाई क्षेत्र खुले झाले आहे. जझीरा एअरवेज आणि कुवेत एअरवेजने कुवेतहून भारतासाठी मर्यादित विमान उड्डाणे पुन्हा सुरू केली आहेत. बहारिनचे हवाई क्षेत्र ही खुले झाले आहे. एअर इंडिया एक्सप्रेस आणि गल्फ एअर बहारिनहून भारतातील विविध ठिकाणांसाठी विमान उड्डाणे चालवत आहेत.
इंडिगो देखील आजपासून बहारिनहून भारतासाठी विमान उड्डाणे पुन्हा सुरू करण्याची योजना आखत आहे. इराकचे हवाई क्षेत्र या प्रदेशातील ठिकाणांसाठी मर्यादित विमान उड्डाणांसाठी खुले झाले आहे, ज्याद्वारे भारताकडे पुढील प्रवास केला जाऊ शकतो. इस्रायलचे हवाई क्षेत्र खुले झाले असून, या प्रदेशातील विविध ठिकाणांसाठी मर्यादित विमान उड्डाणे पुन्हा सुरू झाली आहेत, ज्याद्वारे भारताकडे पुढील प्रवास केला जाऊ शकतो.
