Jalgaon News: वीर गुर्जर सेनेतर्फे सरदार वल्लभभाई पटेल जयंतीनिमित्त विविध कार्यक्रमांचं आयोजन करण्यात आलं आहे. 31 ऑक्टोबर रोजी दुपारी 1 वाजता शहरातील आकाशवाणी चौकाजवळील तापी पाटबंधारे शासकीय विश्रामगृह येथे हा कार्यक्रम होणार आहे.
वीर गुर्जर सेनेच्या कार्याचा आढावा
कार्यक्रमाच्या प्रारंभी सरदार वल्लभभाई पटेल यांच्या प्रतिमेचं पूजन करण्यात येणार आहे. त्यानंतर वीर गुर्जर सेनेच्या आतापर्यंतच्या कार्याचा आढावा घेण्यात येणार असून, संघटनेच्या नवीन पदाधिकाऱ्यांची निवड करण्यात येणार आहे. तसेच न्याय निवाडा मंडळाची कार्यकारिणी जाहीर करण्यात येणार असून, नवनियुक्त पदाधिकाऱ्यांचा यावेळी सन्मान करण्यात येणार आहे.
समाजाच्या तक्रारींवर संवादातून तोडगा
समाजात वाढत असलेल्या विविध गैरप्रथा तसेच समाजबांधवांच्या अडचणी व तक्रारी यावरही कार्यक्रमात चर्चा करण्यात येणार आहे. समाजबांधवांनी आपल्या तक्रारी लेखी स्वरूपात घेऊन याव्यात, असं आवाहन करण्यात आलं आहे. प्राप्त तक्रारींवर संवादाच्या माध्यमातून तसेच आवश्यकतेनुसार जिल्हा प्रशासनाच्या माध्यमातून प्रश्न सोडविण्यासाठी न्याय निवाडा मंडळ कार्यरत राहणार आहे.
समाजातील नागरिकांच्या समस्या जाणून घेऊन त्या सोडविण्यासाठी संघटनेच्या माध्यमातून प्रभावीपणे काम करण्यात येणार असल्याचे वीर गुर्जर सेनेतर्फे सांगण्यात आलं. त्यामुळं समाजातील बंधू-भगिनींनी आपल्या तक्रारी व समस्या घेऊन कार्यक्रमास आवर्जून उपस्थित राहावं, असे आवाहन वीर गुर्जर सेनेतर्फे करण्यात आलं आहे.
