Indian Railway: केंद्रीय रेल्वेमंत्री अश्विनी वैष्णव यांनी आज नवी दिल्ली रेल्वे स्थानकाची सर्वंकष पाहणी केली. दिवाळी आणि छठ सणाच्या काळात वाढणारी प्रवाशांची गर्दी लक्षात घेऊन, त्यांनी प्रवाशांसाठीच्या सुविधा, सुरक्षा व्यवस्था आणि गर्दी नियंत्रणासाठी केलेल्या पूर्वतयारीचा आढावा घेतला. यावेळी त्यांनी प्रवाशांशी संवाद साधून स्थानकातील सुविधांबाबत त्यांचे अभिप्राय जाणून घेतले.
सणासुदीचा काळ
दुर्गापूजा, दिवाळी आणि छठ या सणांच्या काळात दरवर्षी रेल्वे स्थानकांवर सर्वाधिक गर्दी होते, असे वैष्णव यांनी सांगितले. प्रवाशांना अधिक चांगल्या सुविधा आणि सोयी उपलब्ध करून देण्यासाठी, तसेच रेल्वे सेवा अधिक कार्यक्षम करण्यासाठी भारतीय रेल्वे सातत्याने सुधारणा करत असल्याचेही त्यांनी नमूद केले.
अतिरिक्त 700 कृत्रिम कॅमेरे
वाढत्या प्रवासी गर्दीचे व्यवस्थापन करण्यासाठी अतिरिक्त विशेष गाड्या सुरू करण्यात आल्या असून, रेल्वे सुरक्षा दलाच्या (आरपीएफ) जवानांची तैनातीही वाढवण्यात आली आहे, असे केंद्रीय मंत्र्यांनी सांगितले. स्थानकातील सुरक्षा आणि देखरेख यंत्रणा अधिक सक्षम करण्यासाठी अतिरिक्त 700 कृत्रिम बुद्धिमत्ता (एआय) आधारित कॅमेरे बसवण्यात आले आहेत. प्रवाशांना स्थानकात आल्यानंतर कमीत कमी वेळेत आपल्या गाडीपर्यंत पोहोचता यावे, यासाठी विशेष लक्ष दिले जात असल्याचेही त्यांनी स्पष्ट केले.
प्रमुख रेल्वे स्थानकांवर प्रवाशांची गर्दी
मुंबई परिसरातील वांद्रे टर्मिनस, लोकमान्य टिळक टर्मिनस (LTT) आणि छत्रपती शिवाजी महाराज टर्मिनस (CSMT) या प्रमुख रेल्वे स्थानकांवर 1 ऑक्टोबर ते 5 नोव्हेंबर 2026 या कालावधीत सुमारे 1.5 कोटी प्रवाशांची ये-जा नोंदवण्यात आली. 1 ते 5 नोव्हेंबर 2026 या गर्दीच्या कालावधीत प्रवाशांची दैनंदिन सरासरी संख्या सुमारे 4 लाखांवरून वाढून 5 लाखांपर्यंत पोहोचली.
