America- Iran conflic: इराणच्या हल्ल्यात जॉर्डनमध्ये आपले दोन सैनिक ठार झाल्यानंतर अमेरिकेने इराणवर नवीन हल्ले सुरू केले आहेत.
अमेरिकेचे राष्ट्राध्यक्ष डोनाल्ड ट्रम्प म्हणाले की मृत्यू ही “खूप दुःखद गोष्ट” आहे. आणि “आम्ही इराणला कधीही अण्वस्त्र बनवू देणार नाही”.
सर्वोच्च इराण कमांडर अली अब्दुल्लाही यांनी अमेरिकेला इशारा दिला आहे की, इराणच्या सशस्त्र दलांकडून “कोणत्याही आक्रमकतेला तितक्याच प्रखरतेने विनाशकारी प्रत्युत्तर दिले जाईल”.
कुवेतच्या सरकारी तेल कंपनीने म्हटले आहे की, इराणच्या हल्ल्यात त्यांच्या एका मुख्य केंद्राला लक्ष्य करण्यात आले आहे, तर दुसरीकडे इराकी माध्यमांनी दिलेल्या वृत्तानुसार, ड्रोन हल्ल्यांच्या पार्श्वभूमीवर एरबिलमधील अमेरिकी दूतावासाने हवाई संरक्षण यंत्रणा सक्रिय केली आहे. असे वृत्त अल जंजिराने दिले.
केशम बेटावर हल्ले
अमेरिकेच्या लढाऊ विमानांनी इराणच्या केशम बेटावर नवीन हवाई हल्ले केले आहेत. इराणच्या तस्निम वृत्तसंस्थेनुसार, बेटावर दोन स्फोटांचे आवाज ऐकू आले. या हल्ल्यांनंतर झालेल्या नुकसानीचा आढावा घेण्यासाठी आपत्कालीन आणि सुरक्षा पथके तैनात करण्यात आली आहेत. अमेरिकेच्या लष्कराने सामरिकदृष्ट्या महत्त्वाच्या होर्मुझच्या सामुद्रधुनीमध्ये वसलेल्या इराणच्या सिरिक या बंदर शहरावर ही हल्ले करून लक्ष्य केले. अमेरिकेच्या सेंट्रल कमांडने (सेंटकॉम) सलग आठव्या रात्री या लष्करी कारवाईची पुष्टी केली आहे. होर्मुझच्या सामुद्रधुनीतील व्यापारी जहाजांची सुरक्षा सुनिश्चित करणे आणि इराणी सैन्याला कमकुवत करणे हा या कारवाईचा उद्देश आहे. असल्याचे ‘सेटकॉम’ने सांगितले.
जॉर्डनमध्ये अमेरिकी सैनिकांच्या मृत्यूने तणाव
शनिवारी जॉर्डनमध्ये दोन अमेरिकी सैनिकांच्या मृत्यूनंतर हा ताजा हल्ला झाला आहे. अमेरिकी लष्कराच्या म्हणण्यानुसार, इराणी क्षेपणास्त्र आणि ड्रोन हल्ल्यांपासून बचाव करताना हे सैनिक मारले गेले. आणखी एक अमेरिकी सैनिक अद्याप बेपत्ता आहे. २८ फेब्रुवारीपासून या संघर्षात एकूण १६ अमेरिकी सैनिक शहीद झाले आहेत. अमेरिकेचे अध्यक्ष डोनाल्ड ट्रम्प यांनी या लष्करी कारवाईचे समर्थन केले असून, इराणला अण्वस्त्रे विकसित करण्यापासून रोखण्यासाठी सैनिकांनी सर्वोच्च बलिदान दिले असल्याचे सांगून त्यांनी सैनिकांच्या मृत्यूवर दुःख व्यक्त केले.
इराणचा इशारा
इराणचे सर्वोच्च नेते, मोजतबा खामेनी म्हणाले की, या हल्ल्यांनी अमेरिकेच्या राष्ट्राध्यक्षांच्या भूमिकेची निष्प्रभता पुन्हा एकदा दाखवून दिली आहे. आपल्या वडिलांच्या हत्येनंतर खामेनी यांनी सत्ता स्वीकारली. त्यांनी इशारा दिला की इराणी जनता आणि प्रतिकार आघाडी अमेरिकेला असा धडा शिकवतील जो ते कधीही विसरणार नाहीत. खामेनी यांचे लष्करी सल्लागार, मेजर जनरल मोहसेन रझाई यांनी इशारा दिला की, जर अमेरिकेने बॉम्बहल्ला सुरूच ठेवला, तर इराण पूर्ण ताकदीने हल्ला चढवेल. इराण आता केवळ प्रत्युत्तर देण्यापुरता मर्यादित राहणार नाही. इराणच्या आरोग्य मंत्रालयाच्या माहितीनुसार, संघर्ष पुन्हा सुरू झाल्यापासून ५० लोक ठार झाले असून ५०० हून अधिक जखमी झाले आहेत.
