Nepal Flood: नेपाळमधील पुराच्या संदर्भात मोठी बातमी समोर आली आहे. इन्फोसिस पब्लिक सर्व्हिसेसचे (CEO) मुख्य कार्यकारी अधिकारी लक्ष गोपीसेट्टी नेपाळमधील पुरात बेपत्ता झाले आहेत. कंपनीने सांगितले की, गोपीशेट्टी हे वैयक्तिक दौऱ्यावर नेपाळला गेले होते. सध्या त्यांच्याशी संपर्क होऊ शकलेला नाही.
नेपाळमधील पुरात आतापर्यंत ६०० हून अधिक लोकांचा मृत्यू झाला आहे. दरम्यान, २,००० हून अधिक लोक अजूनही बेपत्ता आहेत. या लोकांमध्ये आयटी क्षेत्रातील दिग्गज कंपनी इन्फोसिसच्या पब्लिक सर्व्हिसेसचे सीईओ लक्ष गोपीसेट्टी यांचाही समावेश आहे. ते वैयक्तिक दौऱ्यावर नेपाळला गेले होते, असे सांगून कंपनीने त्यांच्या बेपत्ता होण्याची घोषणा केली. पूर ओसरल्यानंतर त्यांच्याशी संपर्क साधण्याचे प्रयत्न सुरू होते, परंतु अद्याप कोणताही संपर्क होऊ शकलेला नाही.
शुक्रवारी कंपनीने जारी केलेल्या निवेदनात म्हटले आहे की, नेपाळ दौऱ्यावर असलेले लक्ष गोपीसेट्टी हे बेपत्ता आहेत. त्यांच्याबद्दल माहिती गोळा करण्यासाठी कंपनी सध्या विविध संस्थांसोबत काम करत आहे. कंपनीने जारी केलेल्या निवेदनात म्हटले आहे, “आम्ही याची पुष्टी करतो की, आमचे सहकारी, लक्ष गोपीसेट्टी, सध्या संपर्कात नाहीत. त्यांच्याबद्दल माहिती गोळा करण्यासाठी आम्ही संबंधित सरकारी अधिकारी आणि संस्थांसोबत काम करत आहोत. कंपनी त्यांच्या कुटुंबीयांच्याही सतत संपर्कात आहे.”
कंपनीच्या वेबसाइटवरील माहितीनुसार, गोपीसेट्टी यांचे काम प्रामुख्याने अमेरिका आणि कॅनडातील सार्वजनिक क्षेत्रावर केंद्रित आहे. ते सार्वजनिक क्षेत्रातील संस्थांना त्यांच्या कार्यांना पाठिंबा देण्यासाठीच्या धोरणांवर सल्ला देतात. ते अनेक वर्षांपासून इन्फोसिसशी संबंधित आहेत.
